43年前嘅今日，總理周恩來因病逝世，終年77歲。喺周恩來死後，遺孀鄧穎超按照丈夫嘅遺願將遺體火化，並將骨灰撒向大地。今日就同大家簡單回顧一下周恩來同香港嘅淵源。

周恩來曾經三次嚟過香港，第一次係早年喺法國留學嗰陣，佢返中國嘅時候途經停香港，喺香港大學同天津南開學校嘅舊同學見面，留咗兩日之後就離開。第二次就係1927年「八一」南昌起義之後，周恩來因為操勞過度，患上嚴重瘧疾，高燒昏迷，黨中央就搵人送佢嚟香港就醫，當時周恩來以上海富商「李老闆」身份住喺油麻地一間豪宅，仲有一個22歲姓范嘅女性扮成「李太」。周恩來好返之後繼續喺間屋同革命同志見面，之後先返上海。1928年，周恩來第三次嚟香港，而呢一次就係因為受中央委託，喺香港主持廣東省委擴大會議。

建國之後，成為總理嘅周恩來相當關心香港事務，1951年九龍東頭村大火，過萬人無家可歸，周恩來下令派「粵穗慰問團」嚟香港，但被港英政府拒絕，最終釀成警民衝突。另一次就係1963年，當時香港島缺水，周恩來就指示廣東省採取措施，幫香港渡過難關。喺1975年底，當時病重嘅周恩來指示，收回香港之後，可以喺一定時期內繼續實行資本主義，而鄧小平亦按照呢個方向，提出「一國兩制」。

原圖取自網絡。